নিপন গোস্বামী

নিপন গোস্বামী (৩ ছেপ্টেম্বৰ ১৯৪২ - ২৭ অক্টোবৰ ২০২২) অসমীয়া চলচ্চিত্ৰ আৰু নাট্যজগতৰ এগৰাকী প্ৰবীণ অভিনেতা। তেজপুৰৰ কলিবাৰীত অভিনেতা পিতৃ চন্দ্ৰধৰ গোস্বামী আৰু সংগীতশিল্পী মাতৃ নিৰুপমা গোস্বামীৰ ঘৰত জন্ম লোৱা তেওঁ সৰুৰে পৰা সাংস্কৃতিক পৰিৱেশত ডাঙৰ-দীঘল হয়। তেওঁ পুনাৰ ফিল্ম এণ্ড টেলিভিছন ইনষ্টিটিউট অৱ ইণ্ডিয়াত প্ৰশিক্ষণ লয় আৰু কিছুদিন অসম চৰকাৰৰ জনসংযোগ বিভাগতো কাম কৰে।

১৯৫৭ চনৰ পিয়লি ফুকনত শিশুশিল্পী হিচাপে তেওঁ প্ৰথম পৰ্দাত দেখা দিয়ে আৰু সংগ্ৰাম ছবিত প্ৰথম নায়কৰ ভূমিকা পায়। ডক্তৰ বেজবৰুৱা (১৯৬৯)ৰে তেওঁ তাৰকা হিচাপে প্ৰতিষ্ঠা লাভ কৰে আৰু ১০০ খনতকৈ অধিক ছবিত অভিনয় কৰে, যাৰ প্ৰায় ৫০ খন অসমীয়া; লগতে কেইখনমান হিন্দী আৰু বঙালী ছবিতো কাম কৰে। আশীৰ দশকৰ আৰম্ভণিৰ পৰা তেওঁ নায়কৰ উপৰি চৰিত্ৰাভিনয়ো কৰিবলৈ লয়। আমাৰ তথ্যভাণ্ডাৰত বৰুৱাৰ সংসাৰ, মান অৰু মৰম, মা, সিৰাজ, জীৱন বাটৰ লগৰী, পলে পলে উৰে মন, মহাসমৰ, ক্ষোভ, দ্য আণ্ডাৰৱৰ্ল্ড আৰু ভাৱৰীয়া আদি ছবি আছে। ডক্তৰ বেজবৰুৱা ২ তেওঁৰ শেষ অভিনীত ছবি।

মঞ্চৰ প্ৰতিও তেওঁৰ গভীৰ টান আছিল। কহিনুৰ, আৱাহন, হেঙুল আৰু শকুন্তলা আদি ভ্ৰাম্যমাণ থিয়েটাৰত অভিনয় কৰাৰ লগতে তেওঁ নাটকো পৰিচালনা কৰে। মুনিন বৰুৱাৰ সৈতে যৌথভাৱে প্ৰতিমা ছবিখন পৰিচালনা কৰে। ২০২১ চনত ড০ ভবেন্দ্ৰনাথ শইকীয়া বঁটাৰে সন্মানিত নিপন গোস্বামীৰ হৃদৰোগত আক্ৰান্ত হৈ গুৱাহাটীত মৃত্যু হয়।