মৃদুলা বৰুৱা

মৃদুলা বৰুৱা অসমীয়া চলচ্চিত্ৰ জগতৰ এগৰাকী অভিনেত্ৰী। শোণিতপুৰ জিলাৰ চতিয়াত জন্ম হোৱা তেওঁৰ পৰিয়াল পিছলৈ বিশ্বনাথ চাৰিআলিলৈ গুচি যায়। মহাবিদ্যালয়ত পঢ়ি থাকোঁতে সদৌ অসম সূৰ্য বৰা সোঁৱৰণী একাংক নাট প্ৰতিযোগিতাত অভিনয়ৰ প্ৰথম পুৰস্কাৰ লাভ কৰে আৰু তাতেই পৰিচালক-অভিনেতা আব্দুল মজিদে তেওঁৰ প্ৰতিভা চিনি পায়।

হেমন্ত দত্ত পৰিচালিত উপপথ (১৯৮০) তেওঁৰ প্ৰথম অভিনীত ছবি যদিও মুখ্য ভূমিকাত অভিনয় কৰা মৰমী (১৯৭৮) আগতে মুক্তি পোৱাৰ বাবে সেইখনেই তেওঁৰ প্ৰথম মুক্তিপ্ৰাপ্ত ছবি। ১৯৭৯ চনৰ মেঘ মুক্তিত তেওঁ যমজ ভগ্নীৰ দ্বৈত চৰিত্ৰত অভিনয় কৰে, যিখন অসমীয়া ছবিত হোৱা প্ৰথম দ্বৈত ভূমিকা। বোৱাৰী (১৯৮২) আৰু ককাদেউতা নাতি আৰু হাতী (১৯৮৩)ৰ সফলতাই তেওঁক সুদক্ষ অভিনেত্ৰী হিচাপে প্ৰতিষ্ঠা দিয়ে। মা (১৯৮৬) আৰু প্ৰতিমা (১৯৮৭)ত তেওঁ নিজতকৈ বেছি বয়সৰ নাৰীৰ চৰিত্ৰ ৰূপায়ণ কৰে। হিয়া দিয়া নিয়া (২০০০)ত ঋণাত্মক চৰিত্ৰতো তেওঁ অভিনয় কৰে আৰু আৱৰ্তন (১৯৯৩), ইতিহাস (১৯৯৬), গুণ গুণ গানে গানে (২০০২)ৰ অভিনয়ৰ বাবে সমালোচকৰ প্ৰশংসা লাভ কৰে। আমাৰ তথ্যভাণ্ডাৰত থকা মান অৰু মৰম, সিৰাজ, প্ৰত্যাৱৰ্তন আৰু বীৰ চিলাৰায়ো তেওঁৰ কাম।

চলচ্চিত্ৰৰ উপৰি তেওঁ ৩০ খনতকৈ অধিক ভিচিডি ছবি, হিন্দী-অসমীয়া ধাৰাবাহিক আৰু টেলিফিল্মত অভিনয় কৰিছে আৰু ভূপেন হাজৰিকাৰ হিন্দী ছবি কালসন্ধ্যা (১৯৯৭)ত অতিথি শিল্পী হিচাপে দেখা দিছে। ২০০০ চনৰ পৰা প্ৰযোজক হিচাপেও তেওঁ দূৰদৰ্শনৰ দুখন ধাৰাবাহিক আৰু অসম চৰকাৰৰ বাবে প্ৰায় দহখন তথ্যচিত্ৰ প্ৰযোজনা কৰে। ২০০৫ চনত অসম ৰাজ্যিক চলচ্চিত্ৰ বঁটাত শ্ৰেষ্ঠ সহায়ক অভিনেত্ৰীৰ সন্মান আৰু ২০২১ চনত অসম ষ্টাৰৰ পৰা জীৱনজোৰা সাধনা বঁটা তেওঁৰ অন্যতম স্বীকৃতি।