মলয়া গোস্বামী

মলয়া গোস্বামী অসমৰ এগৰাকী চলচ্চিত্ৰ অভিনেত্ৰী, যিগৰাকীয়ে নাট্যমঞ্চ আৰু টেলিভিছনতো অভিনয় কৰিছে। তেওঁ জাগীৰোড মহাবিদ্যালয়ৰ শিক্ষা বিভাগৰ মুৰব্বী অধ্যাপিকা হিচাপে অৱসৰ লৈছে। ডিব্ৰুগড়ত জন্ম হোৱা মলয়াই নগাঁও আৰু গুৱাহাটীত পঢ়াশুনা কৰে, গুৱাহাটী বিশ্ববিদ্যালয়ৰ পৰা শিক্ষা বিভাগত স্নাতকোত্তৰ ডিগ্ৰী লয় আৰু কলেজ জীৱনত অসমৰ প্ৰথম মহিলা হকী দলত স্থান পায়।

কুৰি শতিকাৰ সত্তৰৰ দশকত অসমত আৰম্ভ হোৱা নাট্য আন্দোলনৰ জৰিয়তে তেওঁ অভিনয় জগতত প্ৰৱেশ কৰে। প্ৰায় ৩০ খন মঞ্চ নাট আৰু ৪০ খন অনাতাঁৰ নাটত অভিনয় কৰা তেওঁ ১৯৭৭ চনত আকাশবাণীৰ যুৱবাণী অনুষ্ঠানৰ জৰিয়তে বেতাৰৰ লগত জড়িত হয়। ভবেন্দ্ৰনাথ শইকীয়াৰ অন্তৰীপ উপন্যাসৰ আধাৰত নিৰ্মিত অগ্নিস্নান ছবিৰে তেওঁৰ চলচ্চিত্ৰ জীৱনৰ আৰম্ভণি, য'ত তেওঁ মুখ্য চৰিত্ৰ মেনকাৰ ভূমিকাত অভিনয় কৰে।

ফিৰিঙতি (১৯৯২) ছবিৰ বাবে তেওঁ ৰাষ্ট্ৰীয় চলচ্চিত্ৰ বঁটাত শ্ৰেষ্ঠ অভিনেত্ৰীৰ সন্মান লাভ কৰে আৰু উত্তৰ পূব ভাৰতৰ প্ৰথমগৰাকী অভিনেত্ৰী হিচাপে ৰাষ্ট্ৰীয় পৰ্যায়ত খ্যাতি অৰ্জন কৰে। আমাৰ তথ্যভাণ্ডাৰত থকা তেওঁৰ আন ছবিসমূহৰ ভিতৰত মা (১৯৮৬), কনিকাৰ ৰামধেনু (২০০২), অজান ফকীৰ ছাহেব (২০০৮), জীৱন বাটৰ লগৰী (২০০৯), শ্ৰীমন্ত শংকৰদেৱ (২০১০), পলে পলে উৰে মন (২০১১), ভাল পাবো নাজানিলো (২০১৩), কেলেণ্ডাৰ (২০১৮) আৰু ৰাউদ হয় আহা তুমি (২০১৯) উল্লেখযোগ্য। আন্তঃৰাষ্ট্ৰীয় চলচ্চিত্ৰ মহোৎসৱত তেওঁ বিচাৰকৰ আসনো অলংকৃত কৰিছে আৰু ২০১৬ চনত প্ৰাগ প্ৰেৰণা বঁটা আৰু ২০২০ চনত প্ৰাগ চিনে এৱাৰ্ডছ-নৰ্থ ইষ্টৰ সন্মান লাভ কৰে।