এণ্টনী মোৰ নাম

জন্মৰ আগতেই পিতৃৰ স্নেহৰ পৰা বঞ্চিত এণ্টনীক সৰুতে মাকে ফাডাৰ যোচেফৰ হাতত গতাই দিয়ে। অনাথ হৈ ডাঙৰ হোৱা এণ্টনী কেইবাটাও অপৰাধত লিপ্ত হয়। সেইবোৰ আইনৰ দৃষ্টিত অপৰাধ যদিও সাধাৰণ ৰাইজে তেওঁক ভগৱানৰ দৰে চায়।

এণ্টনীয়ে চুৰি-ডকাইতি কৰে, কিন্তু সমাজৰ হিতৰ বাবেহে। কিছুমান সমাজসেৱক আৰু বিষয়াই জনসাধাৰণৰ মংগলৰ আশ্বাস দি তলৰ শ্ৰেণীৰ মানুহকে শোষণ কৰে। এই মুখা পিন্ধা ভদ্ৰলোকসকলৰ মুখা খুলিবলৈকে এণ্টনীয়ে বেআইনী পথ লয়।

শেষত মাতৃৰ কাকুতিত এণ্টনীয়ে পুলিচৰ হাতত ধৰা দিয়ে। আদালতে তেওঁক নিৰ্দোষী ঘোষণা কৰে আৰু তেওঁ নিজৰ পৰিয়ালক পুনৰ বিচাৰি পায়।

ছবিখন শইকীয়া এণ্টাৰপ্ৰাইজৰ বেনাৰত ধৰ্মকান্ত শইকীয়াই প্ৰযোজনা কৰিছিল। নিপ বৰুৱাই পৰিচালনা কৰা এই ছবিৰ লিখনিত নিপ বৰুৱা আৰু মহেন্দ্ৰ বৰঠাকুৰৰ নাম আছে। চিত্ৰগ্ৰহণ নলিন দুৱৰাৰ। সংগীত পৰিচালনা কৰিছিল ৰমেন বৰুৱাই আৰু গীতৰ কথা কেশৱ মহন্তৰ। অভিনয় শিল্পীসকলৰ ভিতৰত ৰেবা ফুকন, আব্দুল মজিদ আৰু বিজু ফুকন আছে।