ব্ৰজেন বৰুৱা

ব্ৰজেন বৰুৱা (২৭ ফেব্ৰুৱাৰী ১৯২৫ - ২৮ জুন ১৯৭২) অসমীয়া চলচ্চিত্ৰৰ অন্যতম পথিকৃৎ আছিল। তেওঁ একাধাৰে প্ৰযোজক, পৰিচালক, সংগীত পৰিচালক, কণ্ঠশিল্পী, অভিনেতা আৰু চিত্ৰনাট্যকাৰ আছিল। গুৱাহাটীৰ বিভিন্ন মঞ্চত অৰ্কেষ্ট্ৰা পৰিচালনা কৰাৰ উপৰি অনাতাঁৰ কেন্দ্ৰতো গীত গাইছিল। তেওঁ পাঁচখন ছবি পৰিচালনা কৰিছিল আৰু আঠখন ছবিৰ সংগীত পৰিচালনা কৰিছিল।

গুৱাহাটীত জন্ম লোৱা তেওঁ এখন সংগীতমুখৰ ডাঙৰ পৰিয়ালত ডাঙৰ-দীঘল হৈছিল। কলিকতা আৰু পিছত কটন কলেজত পঢ়িছিল যদিও পঢ়া সম্পূৰ্ণ কৰিব নোৱাৰিলে। শ্বিলং আৰু জামুগুৰিহাটত অলপ দিন চৰকাৰী চাকৰি কৰি সংগীতৰ সাধনাৰ বাবে সেয়া এৰি দিয়ে। অসমত অৰ্কেষ্ট্ৰাৰ অন্যতম প্ৰৱৰ্তক হিচাপে তেওঁক গণ্য কৰা হয় আৰু গুৱাহাটী অনাতাঁৰ কেন্দ্ৰৰ আৰম্ভণিৰ দিনতে তেওঁ সুৰকাৰ আৰু কণ্ঠশিল্পী হিচাপে যোগ দিয়ে।

১৯৫৬ চনত ভ্ৰাতৃ নিপ বৰুৱাৰ প্ৰথম ছবি স্মৃতিৰ পৰশৰ সংগীত পৰিচালক আৰু অভিনেতা হিচাপে তেওঁ চলচ্চিত্ৰ জগতত প্ৰৱেশ কৰে। ইয়াৰ পিছত লখিমী, মাক আৰু মৰম, ভক্ত প্ৰহ্লাদ, আমাৰ ঘৰ, লাচিত বৰফুকন, নৰকাসুৰ আদি ছবিৰ সংগীত পৰিচালনা কৰে। পৰিচালক হিচাপে আমাৰ তথ্যভঁৰালত থকা ছবিবোৰৰ ভিতৰত আছে ইতু সিতু বহুতু (১৯৬৩), ডক্তৰ বেজবৰুৱা (১৯৬৯), মুকুতা (১৯৭০), ললিতা (১৯৭২) আৰু ওপজা সোণৰ মাটি (১৯৭২)। ডক্তৰ বেজবৰুৱাই আঞ্চলিক ভাষাৰ শ্ৰেষ্ঠ ছবিৰ বঁটা লাভ কৰিছিল আৰু ইয়াক অসমীয়া চলচ্চিত্ৰৰ এক মাইলৰ খুঁটি হিচাপে গণ্য কৰা হয়। বৰুৱাৰ সংসাৰ (১৯৭০) ছবিত তেওঁ অভিনয়ো কৰিছিল।