মন আৰু মৰম

মণিকাই বিপুলৰ কোম্পানীত কেৰাণীৰ কাম কৰে, কথাটো বিপুলে প্ৰথমে নাজানিছিল। ঘটনাক্ৰমে দুয়োৰো চিনাকি হয় আৰু সেই চিনাকিয়ে প্ৰেমলৈ ৰূপ লয়। বিপুলৰ মাকে চহকী পৰিয়ালৰ জীয়ৰী বনুক বোৱাৰী কৰিব বিচাৰে। কিন্তু বনুৱে বিপুলক বন্ধু হিচাপেহে ভাল পায়, তাইৰ প্ৰেম কলেজৰ শিক্ষক প্ৰণয়ৰ লগত। বনুৰ দেউতাকে তেওঁলোকৰ সম্পৰ্কত আপত্তি নকৰে।

বিপুলৰ মাক মণিকাক বোৱাৰী কৰিবলৈ সন্মত হয়, কিন্তু মেনেজাৰ দত্তই বাধা দিয়ে। বহুদিনৰ পৰা মণিকাৰ ওপৰত কু-দৃষ্টি থকা দত্তই কামনা পূৰণ কৰিব নোৱাৰি তাইৰ বিষয়ে ভাবী শাহুৱেকৰ আগত মিছা বদনাম ৰটায়। ফলত মাকে বিয়াত বাধা দিয়ে।

বিপুলে জোৰ কৰি বিয়া পাতিব বিচাৰিলে মাক অসুস্থ হৈ পৰে। মণিকাই নাৰ্চৰ ভূমিকা লৈ যত্ন-পৰিচৰ্যাৰে মাকক সুস্থ কৰি তোলে। তাইৰ সেৱাত সন্তুষ্ট হৈ মাকে অৱশেষত নিজেই বিয়াত সন্মতি দিয়ে।

পৰিচালনাৰ উপৰি ছবিখনৰ সঙ্গীত পৰিচালনাও দ্বিবন বৰুৱাই কৰিছিল। মুঠ পাঁচটা গীত আছে। গীত লিখিছে অজিৎ বৰুৱা আৰু হীৰেন ভট্টাচাৰ্যই, সুৰ ব্ৰজেন বৰুৱা আৰু দ্বিবন বৰুৱাৰ, আৰু কণ্ঠ দিছে দ্বীপেন বৰুৱা আৰু নমিতা ভট্টাচাৰ্যই।