জাংফাই জোনাক

অসমীয়া সমাজত প্ৰচলিত অন্ধবিশ্বাস আৰু তাৰ কুপ্ৰভাৱ ছবিখনে দুটা সমসাময়িক কাহিনীৰ জৰিয়তে দেখুৱাইছে। এটাত এজন সৰল কিশোৰে ইচ্ছাৰ বিৰুদ্ধে সমাজৰ পৰা বাবা বুলি স্বীকৃতি পায়। আনটোত এগৰাকী নিৰ্দোষী কিশোৰীক স্বাৰ্থলোভী জ্যোতিষী আৰু এজন অসাধু লোকে ৰাইজৰ অন্ধবিশ্বাসৰ সুযোগ লৈ ডাইনী আখ্যা দি নৃশংসভাৱে হত্যা কৰে।

সঞ্জীৱ সভাপণ্ডিতে পৰিচালনা আৰু চিত্ৰনাট্য কৰে। হাই ডেফিনিছন ছ’নী ভিডিঅ’ কেমেৰাৰে চিত্ৰগ্ৰহণ কৰা এইখনেই প্ৰথম অসমীয়া চলচ্চিত্ৰ বুলি কোৱা হয়।

চিত্ৰগ্ৰহণ পৰাশৰ বৰুৱাৰ, সংগীত অনিৰুদ্ধ বৰুৱাৰ। সম্পাদনা ৰাতুল ডেকা আৰু সৌৰভ দত্তৰ, কলা নিৰ্দেশনা অনুপ হাজৰিকাৰ আৰু ডি আই কালাৰিষ্ট ৰজত শেঠ। মেক আপ পৰাণ শৰ্মাৰ, প্ৰযোজনা ব্যৱস্থাপনা দিগন্ত কলিতা আৰু পংকজ কলিতাৰ, ছাউণ্ড ৰেকৰ্ডিং দেবজিত গায়নৰ, ভইচ ৰেকৰ্ডিং ফিল্মক্ৰাফ্টৰ যতীন শৰ্মাৰ, আৰু ফাইনেল মিক্স মুম্বাইৰ ৰাজকমল কলামন্দিৰত দেবজিত চাংমাইৰ।

চলচ্চিত্ৰ সমালোচকে ছবিখনৰ ভূয়সী প্ৰশংসা কৰে আৰু বহুতো মহোৎসৱত ইয়াক প্ৰদৰ্শন কৰা হয়। ২০১১ চনত গোৱাৰ ৪২তম আন্তঃৰাষ্ট্ৰীয় চলচ্চিত্ৰ মহোৎসৱৰ ভাৰতীয় পেনোৰামালৈ ইয়াক নিৰ্বাচন কৰা হয়, তৃতীয় গুৱাহাটী আন্তৰ্জাতিক চলচ্চিত্ৰ মহোৎসৱ আৰু হেবিটেট চলচ্চিত্ৰ মহোৎসৱতো ইয়াক দেখুওৱা হয়, আৰু ৫৮তম ৰাষ্ট্ৰীয় চলচ্চিত্ৰ বঁটাত শ্ৰেষ্ঠ অসমীয়া ছবিৰ শিতানত ইয়াক মনোনীত কৰা হয়।