ৰমেন বৰুৱা

ৰমেন বৰুৱা অসমীয়া চলচ্চিত্ৰৰ এগৰাকী সংগীত পৰিচালক আৰু নেপথ্য কণ্ঠশিল্পী। গুৱাহাটীৰ লতাশিল অঞ্চলত জন্ম আৰু ডাঙৰ-দীঘল হোৱা তেওঁ প্ৰখ্যাত বৰুৱা পৰিয়ালৰ সন্তান; ভাতৃ ব্ৰজেন বৰুৱা আৰু নিপ বৰুৱাও অসমীয়া চলচ্চিত্ৰৰ লগত জড়িত আছিল। সৰুৰেপৰা সংগীতৰ প্ৰতি তেওঁৰ অনুৰাগ আছিল আৰু কৈশোৰতে তেওঁ ভাৰতীয় গণনাট্য সংঘৰ সৈতে জড়িত হৈ পৰিছিল।

তেওঁ কণ্ঠশিল্পী হিচাপে কামৰ আৰম্ভণি কৰে, ১৯৫৫ চনত নিপ বৰুৱাৰ স্মৃতিৰ পৰশ ছবিত গান গাই। ১৯৫৯ চনত আমাৰ ঘৰ ছবিত তেওঁ সহকাৰী সংগীত পৰিচালক হিচাপে কাম কৰে, আৰু ১৯৬৯ চনত ব্ৰজেন বৰুৱাৰ ডক্তৰ বেজবৰুৱাত প্ৰথমবাৰৰ বাবে স্বতন্ত্ৰভাৱে সুৰ দিয়ে; ছবিখনৰ গীতবোৰ ইয়াৰ সফলতাৰ অন্যতম কাৰণ আছিল। মুঠ ২৭খন ছবিত তেওঁ স্বতন্ত্ৰভাৱে সংগীত পৰিচালনা কৰিছে। পিছৰ কামৰ ভিতৰত বৰুৱাৰ সংসাৰ, মুকুতা, যোগ-বিয়োগ, ললিতা আৰু ককাদেউতা নাতি আৰু হাতী আছে। আমাৰ তথ্যভাণ্ডাৰত থকা ছবিৰ ভিতৰত এণ্টনী মোৰ নাম (১৯৮৬) অন্যতম। গুৱাহাটী আকাশবাণীৰ নিৰ্বাচিত কণ্ঠশিল্পী আৰু অনুমোদিত সুৰকাৰ হিচাপেও তেওঁ কাম কৰিছিল।

কেশৱ মহন্ত, নৱকান্ত বৰুৱাৰ দৰে গীতিকাৰৰ ৰচনাত তেওঁ সুৰ দিছে, আৰু পিছত সুপ্ৰতিষ্ঠিত হোৱা বহুতো শিল্পীক নেপথ্য কণ্ঠত প্ৰথম সুযোগ দিছিল। ২০১০ চনত অসম চৰকাৰৰ ৰাজ্যিক জীৱনজোৰা সাধনা বঁটা আৰু ২০২৪ চনত ফিল্মফেয়াৰ (অসম)ৰ জীৱনজোৰা সাধনা বঁটা তেওঁ লাভ কৰে।