মইনাজান

জীৱন আৰু জান দুই ভাই। বৃদ্ধা মাকৰ লগত তেওঁলোক গাঁৱত থাকে। জীৱনে জেউতিক বিয়া কৰাইছে। গাঁৱৰে সহজ-সৰল নিৰক্ষৰ ছোৱালী মইনা জানৰ লগতে ডাঙৰ হৈছে, আৰু দুয়োজনে ইজনে সিজনৰ প্ৰতি আকৃষ্ট হৈছে।

চিকিৎসকৰ অভাৱত মাকৰ মৃত্যু হোৱাত জীৱনে প্ৰতিজ্ঞা কৰে যে ভায়েকক ডাক্তৰী পঢ়াব, যাতে সি গাঁৱতে সেৱা আগবঢ়াব পাৰে। ঘৰ-সম্পত্তি আৰু অলংকাৰ বন্ধক দি তেওঁ জানক চহৰলৈ পঠায়। ককায়েকে কিমান ত্যাগ কৰিছে, জানে তাক নাজানে।

ডাক্তৰ হৈ ওলোৱাৰ পিছত চহৰৰ ৰঙীন পৰিবেশত জানে গাঁও, ঘৰ আৰু মইনাক পাহৰি যায়। আধুনিকা ৰীণাৰ প্ৰতি আকৃষ্ট হৈ তেওঁ বিদেশলৈ যোৱাৰ প্ৰস্তুতি চলায়। অৱশেষত তেওঁৰ জ্ঞানচক্ষু মুকলি হয় আৰু তেওঁ নিজৰ গাঁৱলৈ উভতি আহে।

ছবিখন প্ৰেম পিকচাৰচৰ বেনাৰত প্ৰযোজনা কৰিছিল এম পি এন নায়াৰে। নায়াৰ বিদ্যা ৰাওৰ স্বামী আছিল। সঙ্গীত পৰিচালনা খগেন মহন্তৰ আৰু গীত ৰচনা কেশৱ মহন্তৰ।