ভগা খিৰিকী

ছবিখনৰ কেন্দ্ৰত আছে তগৰ নামৰ এগৰাকী যুৱতী, যাৰ গোপনে বিয়া হৈছে কংসেং নামৰ এজন জংগীৰ লগত। পৰিয়ালে গম নোপোৱাকৈ কংসেঙে ৰাতি তগৰৰ খিৰিকী ভাঙি তেওঁৰ কোঠাত সোমায়।

২০১৭ চনত শ্বাহনাব আলমৰ প্ৰযোজনাত ছবিখন ষ্টুডিঅ'ৰ মজিয়ালৈ আহে। পিছলৈ প্ৰিয়ংকা চোপ্ৰাই ইয়াৰ বিষয়ে জানিব পাই ধন বিনিয়োগ কৰিবলৈ আগবাঢ়ি আহে। প্ৰিয়ংকা চোপ্ৰা আৰু তেওঁৰ মাতৃ মধু চোপ্ৰাৰ পাৰ্প'ল পেবল পিকচাৰ্ছ আৰু শ্বাহনাব আলমৰ ইষ্টাৰ্লি এণ্টাৰটেইনমেণ্টে যৌথভাৱে ছবিখন প্ৰযোজনা কৰে। নিৰ্মাণ খৰচ আছিল প্ৰায় ৩.৫ কোটি টকা।

সংগীত আৰু গীত ইবচন লাল বৰুৱাৰ, কণ্ঠ অনিন্দিতা পালৰ। কলা নিৰ্দেশনা ফটিক বৰুৱাৰ আৰু কাৰ্যবাহী প্ৰযোজক শৰতাজ আলম। অভিনয়ত আছে জেৰিফা ৱাহিদ, সীমা বিশ্বাস, জয় কাশ্যপ, সঞ্জয় খাৰঘৰীয়া, কাস্বী শৰ্মা, মহম্মদ আলি শ্বাহ আৰু বিষ্ণু খাৰঘৰীয়া।

২০১৮ চনৰ ২৬ অক্টোবৰত ছবিখন মুক্তি পোৱাৰ কথা আছিল আৰু ইয়াৰ আগদিনা ২৫ অক্টোবৰৰ পৰা আৰম্ভ হোৱা দ্বিতীয় গুৱাহাটী আন্তৰ্জাতিক চলচ্চিত্ৰ মহোৎসৱত ইয়াক উদ্বোধনী ছবি হিচাপে দেখুওৱা হ'ব বুলি ঠিক কৰা হৈছিল।