জিয়া

শৰ্মিষ্ঠা চক্ৰৱৰ্তীয়ে অভিনয় কৰা জিয়া নামৰ যুৱতীগৰাকীয়ে নিৰ্যাতনৰ সন্মুখীন হোৱা দাম্পত্য জীৱনৰ পৰা আঁতৰি আহি একক মাতৃত্বৰ প্ৰত্যাহ্বানসমূহ ঠেকিবলৈ চেষ্টা কৰে। এই সংগ্ৰামত তেওঁৰ ঘনিষ্ঠ বান্ধৱী পল্লৱী (ঈপ্সিতা হাজৰিকা) তেওঁৰ কাষত থাকে।

ছবিখনৰ কাহিনীকাৰ আৰু প্ৰযোজক শৰ্মিষ্ঠা চক্ৰৱৰ্তীৰ মতে, জিয়া কেৱল এজনী নাৰীৰ কাহিনী নহয়, প্ৰতিগৰাকী নাৰী আৰু মাতৃৰ প্ৰতি শ্ৰদ্ধাঞ্জলি আৰু তেওঁলোকৰ দৈনন্দিন সংগ্ৰাম আৰু শক্তিৰ চিত্ৰণ।

ছবিখন পৰিচালনা কৰিছে কেনি বসুমতাৰীয়ে, আৰু শৰ্মিষ্ঠা চক্ৰৱৰ্তী কাহিনীকাৰ তথা প্ৰযোজক। তেওঁ আৰু ঈপ্সিতা হাজৰিকাৰ উপৰি ৰিকি শৰ্মা, কৌশিক ভৰদ্বাজ, মনোজ বৰকটকী, উদয়ন দুৱৰা আৰু শিশুশিল্পী আৰাধ্যা মহন্তে অভিনয় কৰিছে। মুখ্য সহকাৰী পৰিচালক অৰিন্দম কাশ্যম, প্ৰডাকচন মেনেজাৰ বিভাস সিনহা, আৰু সাজসজ্জাৰ দায়িত্বত ঈপ্সিতা হাজৰিকা।

সংগীত অম্বৰ দাসৰ। গীতত কণ্ঠ দিছে অংগৰাগ মহন্ত, শংকুৰাজ কোঁৱৰ, মৈত্ৰেয়ী পাটৰ, শৰ্মিষ্ঠা চক্ৰৱৰ্তী আৰু ঈপ্সিতা হাজৰিকাই। ছবিখন ২০২৪ চনৰ ১৭ মে'ত অসমৰ ছবিগৃহত মুক্তি পায়।

প্ৰাগ চিনে বঁটাত ছবিখনে পাঁচটা মনোনয়ন লাভ কৰি চাৰিটা শাখাত বিজয়ী হয়। শ্ৰেষ্ঠ ছবিৰ উপৰি শ্ৰেষ্ঠ চিত্ৰনাট্য (কেনি বসুমতাৰী আৰু শৰ্মিষ্ঠা চক্ৰৱৰ্তী), শ্ৰেষ্ঠ পুৰুষ কণ্ঠশিল্পী (অংগৰাগ মহন্ত) আৰু শ্ৰেষ্ঠ নেপথ্য সংগীত (অম্বৰ দাস)ৰ বঁটা ইয়াৰ ভাগ্যত পৰে।

ব্ৰহ্মপুত্ৰ ভেলি ছবি মহোৎসৱৰ পৰাও ছবিখনে আনুষ্ঠানিক নিমন্ত্ৰণ লাভ কৰে আৰু ২০২৩ চনৰ ১৫ ডিচেম্বৰত তাত প্ৰদৰ্শিত হয়। দৰ্শকৰ মাজত ছবিখনে ইতিবাচক সঁহাৰি লাভ কৰে।