কুশল

১৯৪২ চনত ব্ৰিটিছ শাসনকালত গোলাঘাট জিলাৰ সৰুপথাৰৰ কংগ্ৰেছ গোটে মহাত্মা গান্ধীৰ 'কৰেংগে য়া মৰেংগে' আহ্বানৰ ভুল অৰ্থ কৰি অহিংসা নীতি উলংঘা কৰে আৰু ব্ৰিটিছ সৈন্য আৰু সা-সামগ্ৰী কঢ়িয়াই নিয়া এখন ৰে'লগাড়ী দুৰ্ঘটনাত পেলাবলৈ সিদ্ধান্ত লয়। গোটৰ সভাপতি কুশল কোঁৱৰে (সঞ্জীৱ সভাপণ্ডিত) এই সিদ্ধান্তৰ বিৰোধিতা কৰে যদিও সফল নহয়, আৰু দুৰ্ঘটনা সংঘটিত হয়।

পাছত স্বদেশৰ খাতিৰত কুশলে দুৰ্ঘটনাৰ সম্পূৰ্ণ নৈতিক দায়িত্ব স্বীকাৰ কৰে। জিলাৰ মুখ্য ব্ৰিটিছ বিষয়া চি. এ. হাম্ফ্ৰীয়ে (গেৰী ৰিচাৰ্ডচন) দোষী হিচাপে এজন গুৰুত্বপূৰ্ণ ব্যক্তি বিচাৰিছিল, আৰু কুশল আছিল তাৰ উপযুক্ত প্ৰাৰ্থী, কাৰণ তেওঁ সৎ মানুহ হিচাপে খ্যাত আছিল আৰু এক ক্ষমতাসম্পন্ন ৰাজবংশৰ উত্তৰাধিকাৰীও আছিল। ১৯৪৩ চনত কুশলক ফাঁচী দিয়া হয়।

অসম চৰকাৰৰ সাংস্কৃতিক সঞ্চালকালয়ে ছবিখন প্ৰযোজনা কৰে। ১৯৮৪ চনত তেতিয়াৰ মুখ্যমন্ত্ৰী হিতেশ্বৰ শইকীয়াই প্ৰকল্পটো হাতত লৈ জাহ্নু বৰুৱাক পৰিচালনাৰ দায়িত্ব দিয়ে, যেতিয়া বৰুৱাই মাত্ৰ প্ৰথমখন ছবি অপৰূপা কৰিছিল। কিন্তু কংগ্ৰেছ চৰকাৰৰ পতন হোৱাত প্ৰকল্পটো থমকি ৰয়। নব্বৈৰ দশকৰ আৰম্ভণিতহে ৬০ লাখ টকাৰ বাজেটেৰে ই পুনৰ আৰম্ভ হয়।

বৰুৱাৰ কথামতে তেওঁ ছবিখনত মুঠ ছয় বছৰ কাম কৰে, পাঁচ বছৰ গৱেষণাত আৰু এক বছৰ শ্বুটিঙত। বাজেট কম হোৱাৰ বাবে ৰে'ল লাইন বিচ্ছিন্ন কৰাৰ দৃশ্য ছবিখনত নাই। অভিনয়ত আছে সঞ্জীৱ সভাপণ্ডিত, গেৰী ৰিচাৰ্ডচন, বীণা পটংগীয়া, দীনেশ দাস, পৃথ্বীৰাজ ৰাভা, অনুপ হাজৰিকা, ভিক্টৰ ডেভিদ চেচুন, চাকিৰ হাজৰিকা, প'ল কাৰ্লিন আৰু ফিলিপ্স বসু।

১৯৯৮ চনত ছবিখনে অসমীয়া ভাষাৰ শ্ৰেষ্ঠ চলচ্চিত্ৰৰ ৰাষ্ট্ৰীয় বঁটা লাভ কৰে। ইয়াক ভাৰতীয় পেনোৰামালৈ নিৰ্বাচন কৰা হয়, ১৯৯৯ চনৰ চতুৰ্থ আন্তঃৰাষ্ট্ৰীয় কেৰালা চলচ্চিত্ৰ মহোৎসৱত আৰু ২০১১ চনৰ ৪০তম পেৰিছ শীত মহোৎসৱত প্ৰদৰ্শন কৰা হয়। ভাৰতৰ ৬৪ তম স্বাধীনতা দিৱসৰ দিনা লণ্ডনৰ নেহৰু চেণ্টাৰতো ছবিখন দেখুওৱা হৈছিল।