কল্লোল

কল্লোল এখন বিদ্ৰোহাত্মক, প্ৰতীকধৰ্মী ছবি, য’ত সামন্তবাদী সমাজৰ শ্ৰেণীদ্বন্দ্ব দেখুওৱা হৈছে। সামন্তপ্ৰভু হ’ল জমিদাৰ অনঙ্গপ্ৰসাদ চৌধুৰী (বৰুৱা), আৰু স্থানীয় মাছমৰীয়াবোৰ তেওঁৰ অধীনস্থ। সিহঁতে মাছ ধৰে, কিন্তু গুৰিভাগ পায় জমিদাৰে।

মাছমৰীয়াই এটা বৃহৎ আকাৰৰ মাছ ধৰাত ব্যৰ্থ হোৱাত চৌধুৰী ক্ৰোধান্বিত হয়। জমিদাৰক গ্ৰাহ্য নকৰা বিদ্ৰোহী যুৱক মণিয়ে সেই মাছটো ধৰিবলৈ সক্ষম হয়। শেষত মাছমৰীয়াবোৰে জমিদাৰৰ বিৰুদ্ধে বিদ্ৰোহ কৰে আৰু সেই বিদ্ৰোহৰ নেতৃত্ব দিয়ে মণিয়ে।

ছবিখনৰ সংগীত পৰিচালনা আৰু গীত ৰচনা কৰে ৰুদ্ৰ বৰুৱাই, কণ্ঠদান নমিতা ভট্টাচাৰ্যৰ। অনঙ্গপ্ৰসাদ চৌধুৰীৰ ভূমিকাত অভিনয় কৰে চন্দ্ৰ নাৰায়ণ বৰুৱাই। অন্য শিল্পীসকলৰ ভিতৰত আছিল বিষ্ণু খাৰঘৰীয়া, লাচিত ফুকন, বীণা শইকীয়া, মহিধৰ গোহাঁই, ৰণেন সাহা, ভৰত ৰাজখোৱা, প্ৰতিমা মহন্ত আৰু মহিউদ্দিন আহমেদ।

কল্লোলে ১৯৭৯ চনৰ ২৭তম ৰাষ্ট্ৰীয় চলচ্চিত্ৰ বঁটাত শ্ৰেষ্ঠ অসমীয়া ছবিৰ ৰজত কমল লাভ কৰে। ছবিখন ১৯৭৮-৭৯ৰ ভাৰতীয় পেনোৰামালৈও নিৰ্বাচিত হয়।