হৃদয়ৰ প্ৰয়োজন

অজয় এক চহকী দম্পতীৰ একমাত্ৰ সন্তান। মাক দেউতাকৰ অতিৰিক্ত মৰমত তাৰ পূৰ্ণ বিকাশ নহ’ল, সি মানসিক বিকাৰত ভুগিবলৈ ধৰিলে আৰু নাৰীৰ প্ৰতি বিদ্বেষ জন্মিল। দেউতাক বিজয় চৌধুৰীক ইয়াৰ বাবে দায়ী কৰা হৈছে। সি আংশিকভাৱে যৌন অক্ষম হৈ পৰিল। বিশাল সম্পত্তিৰ ভৱিষ্যতৰ চিন্তাত দেউতাকে পুতেকৰ বিয়া পাতি দিয়াৰ মন কৰিলে, যদিও এনে ল’ৰালৈ কোনেনো ছোৱালী দিব।

সুমিতা ৰূপে গুণে অতুলনীয়। শিক্ষক দেউতাকৰ মৃত্যুৰ পাছত মাক, বিধৱা বায়েক আৰু দুজনী ভনীয়েকৰ ঘৰখন অতি কষ্টেৰে চলিছে, গতিকে এম.এ. পাছ কৰি তাইৰ চাকৰি এটাৰ বৰ প্ৰয়োজন। বিজয় চৌধুৰীয়ে তাইকেই পুতেকৰ বোৱাৰী কৰি আনে। ঘৰখন বচাবলৈ তাই অক্ষম ল’ৰাটোলৈ বিয়া হ’ল, কিন্তু তাইৰো অন্য প্ৰয়োজন থাকিব পাৰে, আৰু চৌধুৰীয়ে সেয়া জানিও নজনাৰ ভাও ধৰি থাকিল।

হোমেন বৰগোহাঞিৰ কাহিনীৰ পৰা গৌৰী বৰ্মনে চিত্ৰনাট্য আৰু সংলাপ লিখে। ছবিখন কামাখ্যা চিত্ৰৰ বেনাৰত নিৰ্মিত, শব্দগ্ৰহণ অমূল্যৰ আৰু কলা নিৰ্দেশনা গৌৰী বৰ্মন আৰু বিজয় বসুৰ।

সংগীত পৰিচালনা ৰমেন বৰুৱাৰ, আৰু গীত লিখিছে কেশৱ মহন্ত আৰু সতীশ দাসে। ছবিখনত শ্ৰীমন্ত শংকৰদেৱৰ এটি বৰগীতো অন্তৰ্ভুক্ত।

ছবিখনে চেঞ্চৰ বোৰ্ডৰ পৰা A প্ৰমাণপত্ৰ লাভ কৰে, আৰু এই প্ৰমাণপত্ৰ পোৱা প্ৰথম অসমীয়া ছবি এইখনেই।