পাপ আৰু প্ৰায়শ্চিত্ত

এজন বিচাৰকে জীৱনত কেতিয়াও কাকো ফাঁচীৰ আদেশ দিয়া নাছিল। পত্নী আৰু তিনিজনী জীয়ৰীৰ সৈতে তেওঁৰ এখন সুখৰ সংসাৰ। এদিন তেওঁ গম পায় যে সন্তান জন্ম দিয়াৰ ক্ষমতা তেওঁৰ নাই। তেন্তে তিনিজনী জীয়ৰীৰ জন্ম হ’ল কেনেকৈ? এটা এটাকৈ পত্নীৰ দুশ্চৰিত্ৰতাৰ কথা তেওঁৰ চকুত ধৰা পৰে।

সহজ-সৰল মানুহজন প্ৰতিশোধপৰায়ণ হৈ পৰে আৰু এক কঠোৰ সিদ্ধান্ত লয়। সংগোপনে তেওঁ পত্নী আৰু তিনিওজনী জীয়েকক হত্যা কৰে। কিন্তু পাপ লুকাই নাথাকে। তেওঁ আৰক্ষীৰ হাতত ধৰা পৰে, বিচাৰ চলে আৰু অৱশেষত তেওঁক ফাঁচীৰ হুকুম শুনোৱা হয়।

ছবিখন ১৯৭০ চনত ধুবুৰীত ঘটা এক হত্যাকাণ্ডৰ আধাৰত নিৰ্মিত। অবিভক্ত গোৱালপাৰা জিলাৰ সদ্য অৱসৰপ্ৰাপ্ত জিলা আৰু সত্ৰ ন্যায়াধীশ উপেন্দ্ৰনাথ ৰাজখোৱাই নিজৰ পত্নী আৰু তিনিজনী গাভৰু জীয়েকক হত্যা কৰি গাঁত খান্দি পুতি থৈছিল। পিছত তেওঁ আৰক্ষীৰ হাতত ধৰা পৰে আৰু আদালতে তেওঁক ফাঁচীৰ হুকুম দিয়ে।

পৰিচালনা আনোৱাৰ হুছেইনৰ। অভিনয়ত আছিল পবিত্ৰ বৰকটকী, তচদ্দুক ইউছুফ, নিবেদিতা শৰ্মা আদি। সংগীত পৰিচালনা জীতেন বৰুৱাৰ আৰু কণ্ঠদান কৰিছে ভাস্কৰ দাস, কুল বৰুৱা আৰু মৃদুলা দেৱান দাসে।