আলোকৰ আহ্বান

নিষ্ঠাবান সমবায় বিষয়া বিমল এখন গাঁৱলৈ যায় ৰেচম সমবায় সমিতি গঠন কৰিবলৈ, যাতে গাঁওবাসী মহাজনৰ শোষণৰ পৰা ৰক্ষা পায়। গাঁওখনৰ একমাত্ৰ গ্ৰেজুৱেট, গাঁওবুঢ়াৰ জীয়ৰী মালতীয়ে তেওঁৰ এই মহৎ কামত সহায় কৰে।

লক্ষ্যত উপনীত হোৱাৰ আগতেই তেওঁলোকে বহুতো বাধাৰ সন্মুখীন হয়; মহাজন আৰু তেওঁৰ অনুগামীৰ পৰা মাত্ৰ নহয়, গাঁওবাসীৰ পৰাও। গাঁওবাসীয়ে বিমলক বহিৰাগত বুলি ভাবে আৰু মালতীৰ লগত তেওঁৰ অবৈধ সম্পৰ্ক আছে বুলি দোষাৰোপ কৰে। এই সকলো বাধা অতিক্ৰম কৰি শেষত সমবায় সমিতিখন কেনেকৈ গঠন হয়, সেয়াই ছবিখনত দেখুওৱা হৈছে।

ডো-ৰে-মি ফিল্মচৰ বেনাৰত চাৰু কমল হাজৰিকাই ছবিখন পৰিচালনা কৰে আৰু সংগীত দিছিল নয়নে। বিমলৰ চৰিত্ৰত অভিনয় কৰে বিমল জ্যোতি চৌধুৰীয়ে আৰু মালতীৰ চৰিত্ৰত পূৰৱী দাসে।

১৯৮৩ চনৰ ৩১তম ৰাষ্ট্ৰীয় চলচ্চিত্ৰ বঁটাত আঞ্চলিক ভাষা শিতানত আলোকৰ আহ্বানে শ্ৰেষ্ঠ অসমীয়া ছবিৰ ৰজত কমল বঁটা লাভ কৰে। অসমৰ হস্ততাঁত খণ্ডৰ গ্ৰামীণ সমবায়ৰ বাস্তৱবাদী পৰিৱেশনৰ বাবে ছবিখনে এই স্বীকৃতি পায়। ৰূপৰ মেডেলৰ সৈতে প্ৰযোজকলৈ ১৫,০০০ টকা আৰু পৰিচালকলৈ ৭,৫০০ টকা নগদ পুৰস্কাৰ আগবঢ়োৱা হৈছিল।