হেমন্ত দত্ত

হেমন্ত দত্ত এগৰাকী অসমীয়া নাট্যকাৰ, গীতিকাৰ, অভিনেতা আৰু পৰিচালক আছিল। ১৯৪১ চনত দৰং জিলাৰ খাৰুপেটীয়াত জন্ম হোৱা দত্তই এশৰো অধিক নাট আৰু পাঁচশৰো অধিক গীত ৰচনা কৰিছিল, আৰু বহুতো নাট পৰিচালনা কৰিছিল। আমাৰ তথ্যভাণ্ডাৰত চলচ্চিত্ৰ পৰিচালক হিচাপে তেওঁৰ ছবিখন উপপথ (১৯৮০)।

১৯৭৭ চনত নতুন আশা ছবিৰ জৰিয়তে তেওঁ পেচাদাৰী গীতিকাৰ হিচাপে গীত ৰচনা কৰিবলৈ আৰম্ভ কৰে। জুবিন গাৰ্গ, জয়ন্ত হাজৰিকাকে ধৰি বহু কণ্ঠশিল্পীয়ে তেওঁৰ গীতত কণ্ঠদান কৰিছে। তেওঁ সাদৰী, সোণমইনা, ব'হাগৰ দুপৰীয়া, হিয়া দিয়া নিয়া, নায়ক আদি ছবিৰ বাবে গীত লিখিছিল। পিতা-পুত্ৰ ছবিত তেওঁ লিখা ১১৬ শাৰীৰ গীতটি সকলোতকৈ দীঘল অসমীয়া গীত বুলি কোৱা হয়। অভিনেতা হিচাপে তেওঁ অনিৰ্বাণ, ঘৰ সংসাৰ, শেৱালি, বাৰুদ আদি ছবিতো অভিনয় কৰিছিল।

তেওঁ ভবেন বৰুৱা বঁটা (২০১৭) আৰু অসম সৌৰভ বঁটা (২০২৪) আদি সন্মান লাভ কৰিছিল। ২০২৫ চনৰ ১১ আগষ্টত গুৱাহাটীত তেওঁৰ মৃত্যু হয়।