সূত্ৰপাত

১৯৮২ চন। বিদেশী বহিষ্কাৰ আন্দোলন তুংগত, সাংস্কৃতিক জগতখনত এক থমথমীয়া পৰিবেশ। তথাপি দিগন্ত আৰু তাৰ বন্ধুসকলে 'ছিৰাজ' নাটখন মঞ্চস্থ কৰাৰ সিদ্ধান্ত লয় আৰু আখৰাত লাগি যায়। ইতিমধ্যে বিধানসভা নিৰ্বাচনৰ ঘোষণা হয়, চৌদিশে অশান্তি লাগে আৰু ঠায়ে ঠায়ে সাম্প্ৰদায়িক সংঘৰ্ষ চলে।

চলচ্চিত্ৰৰ সামাজিক প্ৰভাৱৰ কথা ভাবি দিগন্তহঁতে সাম্প্ৰদায়িক সম্প্ৰীতিমূলক এখন চুটিছবি বনোৱাৰ পৰিকল্পনা কৰে। হতাশাত ভোগা অভিজ্ঞ কেমেৰামেন চোপ্ৰাই ইয়াত কাম কৰাৰ প্ৰতিশ্ৰুতি দিয়ে; দিগন্ত তেওঁৰ বাবেই চলচ্চিত্ৰৰ প্ৰতি আগ্ৰহী হৈছিল। আনোৱাৰ আৰু আন কেইজনমান বন্ধুৰ সহযোগত ছবিৰ কাম শেষ হয়।

কিন্তু পৰিবেশন আৰু ঋণৰ সমস্যাই আগুৰি ধৰিলে আৰম্ভণিৰ উচ্ছ্বাস নাইকিয়া হয়। সিহঁতে চৰকাৰৰ দপ্তৰে দপ্তৰে ঘূৰি ফুৰে, কিন্তু সঁহাৰি নাপায়। লাহে লাহে বন্ধুসকল এজন এজনকৈ আঁতৰি যায় আৰু দিগন্তে ভালপোৱা মালবিকায়ো এদিন তাক অপদস্থ কৰে। তথাপি আশা নেৰি সি মন্ত্ৰীক লগ ধৰে, কিন্তু লাভ নহয়। কান্ধত ফিল্মৰ কেন লৈ সি ওলাই আহে; হঠাতে চিটিবাছৰ পৰা মালবিকাই মাতে, দিগন্তৰ বুকুলৈ আস্থা ঘূৰি আহে আৰু সন্ধিয়াৰ ৰাজপথত হেজাৰজনৰ মাজত সি লাহে লাহে মিলি যায়।

আই.পি. প্ৰডাকচন্সে ছবিখন নিৰ্মাণ কৰে আৰু পৰিচালনা কৰে মৃদুল গুপ্তাই। মুখ্য ভূমিকাত তপন দাস। কেমেৰামেন চোপ্ৰাৰ চৰিত্ৰত অভিনয় কৰে বলীউডৰ অভিনেতা চৈয়দ আখতাৰ মিৰ্জাই। সংগীত পৰিচালনা বিভূৰঞ্জন চৌধুৰীৰ আৰু গীত ৰচনা কেশৱ মহন্তৰ। আমাৰ তথ্যভাণ্ডাৰত ছবিখনৰ মুক্তিৰ তাৰিখ ১৯৮৭ চনৰ ১১ ডিচেম্বৰ বুলি উল্লেখ আছে।