ৰতনলাল

অসম চাহ মজদুৰ সংঘই ছবিখন প্ৰযোজনা কৰিছিল আৰু নলিন দুৱৰাই পৰিচালনাৰ লগতে চিত্ৰগ্ৰহণো কৰিছিল। যোগেশ দাসৰ কাহিনীৰ আধাৰত ভৰত বৰপূজাৰীয়ে চিত্ৰনাট্য আৰু সংলাপ ৰচনা কৰে। ইয়াৰ আগতে ভৰত বৰপূজাৰীয়ে ইণ্ডিয়ান নেচনেল ট্ৰেড ইউনিয়ন কংগ্ৰেছৰ (INTUC) অসম শাখাৰ উদ্যোগত নিৰ্মিত আন এখন চাহ বনুৱা কেন্দ্ৰিক ছবি কেঁচা সোণৰ (১৯৫৯) কাহিনী আৰু চিত্ৰনাট্য লিখিছিল।

বিশ্বজিৎ, ধীৰু ভূঞা, পবিত্ৰ বৰকাকতি আৰু নেইমুদ্দিনে ছবিখনত অভিনয় কৰিছে। জানকী নামৰ মূল নাৰী চৰিত্ৰত আছে ঝৰ্ণা শইকীয়া। তেতিয়া কানৈ কলেজৰ ছাত্ৰী ঝৰ্ণা শইকীয়াৰ এইখনেই প্ৰথম আৰু শেষ ছবি।

সংগীত পৰিচালনা নিৰ্মল চক্ৰৱৰ্তীৰ আৰু গীত ৰচনা নিৰ্মলপ্ৰভা বৰদলৈৰ। খগেন মহন্তই গোৱা এটা গীত পিছলৈ তেওঁৰ পুত্ৰ পাপনে নতুন শৈলীত পৰিবেশন কৰে আৰু যুৱ প্ৰজন্মই ইয়াক আগ্ৰহেৰে গ্ৰহণ কৰে।

ৰতনলালৰ গীতবোৰ মুক্তিৰ সময়ত যথেষ্ট জনপ্ৰিয় হৈছিল, আৰু ইয়াৰে এটা গীতে আধুনিক সংস্কৰণৰ জৰিয়তে নতুন শ্ৰোতা পাইছে।