পৰিণাম

হৰেন্দ্ৰই দুই সন্তান জীৱন আৰু ৰবীনক উচ্চশিক্ষাৰে শিক্ষিত কৰি তোলাৰ সপোন দেখিছিল। কিন্তু এদিন তেওঁৰ মৃত্যু হয়। ভাগ্যৰ সৈতে সংগ্ৰাম কৰি হৰেন্দ্ৰৰ বিধৱা পত্নী প্ৰতিভাই দুই সন্তানক লৈ জীয়াই থাকে। খলনায়কৰ অত্যাচাৰত জীৱন আৰু ৰবীন জৰ্জৰিত হৈ পৰে।

ছবিখনৰ নায়িকা মমী বৰুৱা অগাধ সম্পত্তিৰ গৰাকী। সেই সম্পত্তিতো খলনায়কৰ লোলুপ দৃষ্টি পৰে আৰু তাইৰ সম্পত্তি হাত কৰিবলৈ ষড়যন্ত্ৰ চলে। কিন্তু সকলো বেয়া কামৰে এটা শেষ আছে, এটা পৰিণাম আছে। অৱশেষত খলনায়কেও নিজৰ পাপৰ প্ৰায়শ্চিত্ত কৰিবলগীয়া হয়।

ছবিখন বিজয় ফিল্মছৰ বেনাৰত নিৰ্মিত আৰু ইয়াৰ পৰিচালনা আৰু প্ৰযোজনা প্ৰবীণ বৰাৰ। শব্দগ্ৰহণ অৱণী চেতাৰ্জীৰ আৰু দৃশ্যসজ্জা তৰুণ সন্দিকৈ আৰু হেমেন দাসৰ।

সঙ্গীত পৰিচালনা ৰমেন বৰুৱাৰ। গীত লিখিছিল সতীশ দাস আৰু নৱকান্ত বৰুৱাই আৰু কণ্ঠ দিছিল দ্বীপেন বৰুৱা আৰু নীলিমা খাতুনে। অভিনয়ত আছিল ইভা আচাও, ইলা কাকতি, ইফতিকাৰ আহমেদ, জুনু বৰুৱা, জেইবা মমতাজ, প্ৰবীণ বৰা আদি।