নতুন পৃথিৱী

ছবিৰ কাহিনী বিধৱা বিবাহক কেন্দ্ৰ কৰি ৰচিত আৰু ই নাৰীৰ দৃষ্টিভংগীৰে কোৱা হৈছে। আমাৰ হাতত থকা তথ্যত কাহিনীৰ বিষয়ে ইয়াতকৈ বিশদ বিৱৰণ নাই।

কাহিনী ৰচনা, পৰিচালনা আৰু প্ৰযোজনা আনোৱাৰ হুছেইনৰ। সংলাপ লিখিছিল পদ্ম বৰকটকী আৰু সৰ্বানন্দই। কলিকতাৰ ২নং নিউ থিয়েটাৰ্চ ষ্টুডিঅ'ত ছবিখন নিৰ্মাণ কৰা হৈছিল আৰু শব্দগ্ৰহণ কৰা হৈছিল আৰ.চি.এ. পদ্ধতিত। প্ৰচাৰৰ বাবে ট্ৰেলাৰ মুক্তি দিয়া এইখনেই প্ৰথম অসমীয়া ছবি।

অভিনয়ত আছিল অনুপমা ভট্টাচাৰ্য, বিমল নাথ, মলয়া দাস, বীণা দাস, বুধীন শৰ্মা, বিভূতি চক্ৰৱৰ্তী, সৰ্বানন্দ পাঠক, গীতা ভট্টাচাৰ্য, কল্পনা ৰায় আৰু হেমেন চৌধুৰী; লগতে পশ্চিমবংগৰ নিতীশ মুখাৰ্জী, পদ্মা দেৱী, তপতী ঘোষ আৰু অৰুণ কুমাৰেও অভিনয় কৰিছিল।

সংগীত পৰিচালনা ত্ৰিধাৰাৰ বুলি উল্লেখ আছে, যদিও কিছুমান উৎসত মুকুল বৰুৱা আৰু ৰাজেশ্বৰ বৰদলৈৰ নাম সংগীত পৰিচালক হিচাপে দিয়া হৈছে। কণ্ঠদান কৰিছিল শেৱালী দেৱী, মিহিৰ বৰদলৈ, জ্যোতিৰ্ময় কাকতি আৰু মুকুল বৰুৱাই।