যোগ-বিয়োগ

নীৰু আৰু ধনী ঘৰৰ সন্তান দীপকৰ মাজত ঘনিষ্ঠতা হয়, আৰু নীৰুৱে গম পায় যে তেওঁ মাতৃত্বৰ পথত। উপায়হীন হৈ তেওঁ ডাক্তৰ ফুকনৰ ওচৰ চাপে। ডাক্তৰৰ চেষ্টাত দীপকে নীৰুক বিয়া কৰাবলৈ সন্মত হয়, কিন্তু এটা চৰ্তত: নিজৰ সন্মান ৰক্ষাৰ বাবে নীৰুৱে সন্তানটো নষ্ট কৰিব লাগিব। ডাক্তৰ দহ হাজাৰ টকাৰ বিনিময়ত ৰাজি হয়, আৰু নীৰুৱে কেইমাহমান ডাক্তৰৰ শুশ্ৰূষা কেন্দ্ৰত থাকিব লগা হয়।

দুয়োৰে বিয়া হয় আৰু তেওঁলোকৰ এজনী ছোৱালী হয়, নাম দীপা। লাহে লাহে দীপা ডাঙৰ হয় আৰু দীপকৰ বন্ধুৰ পুত্ৰ পৰাণৰ সৈতে তাইৰ ঘনিষ্ঠতা গঢ়ি উঠে।

ইয়াৰ সমান্তৰালকৈ আছে গাঁৱৰ ল’ৰা নয়নৰ কাহিনী। গাঁৱৰে ছোৱালী জয়াক বিয়া কৰাবলৈ প্ৰতিশ্ৰুতি দি তেওঁ চহৰলৈ আহি ইঞ্জিনিয়াৰিং পঢ়ে আৰু পঢ়া শেষ কৰি দীপকৰ কাৰখানাত চাকৰি লয়। কিন্তু সময়ৰ লগে লগে ঘটনাৰ গতি বেলেগ ৰূপ লয়।

দ্বিবন বৰুৱাই ছবিখন পৰিচালনা কৰাৰ লগতে কাহিনী আৰু চিত্ৰনাট্য লিখিছিল। প্ৰযোজক সুপ্ৰভা দেৱী। সংগীত পৰিচালনা কৰিছিল ৰমেন বৰুৱাই, গীত ৰচনা কেশৱ মহন্তৰ, আৰু শব্দগ্ৰহণ অনিল দাসগুপ্তৰ।

শিল্পীসকলৰ ভিতৰত আছে ডাঃ হাদি আলম বৰা, ইলা কাকতি, মোৱাজ্জিন আলি, নিৰদা ভূঞা আৰু ডাঃ মুনীন বৰুৱা। ভোলা কাকতি, ধীৰু ভূঞা, গিৰিণ বৰুৱা, গৌৰী বৰুৱা, মাষ্টাৰ সিদ্ধাৰ্থ, বেবী মঞ্জুলা, বিদ্যুৎ চক্ৰৱৰ্তী আৰু বেবী মাচুৱেও অভিনয় কৰিছিল।

ছবিখনৰ একমাত্ৰ প্ৰিণ্টটো ২০১৩ চনত জৰাজীৰ্ণ ৰূপত উদ্ধাৰ কৰা হয়, আৰু তাৰ পিছত দূৰদৰ্শনযোগে সম্প্ৰচাৰ কৰা হয়।