নয়নমণি

পৰাগ আৰু অৰূপ দুই ভাই, মাকৰ সৈতে একেলগে থাকে। পৰাগৰ পত্নী জীনু। অৰূপে ভাল পায় মইনা ওৰফে নয়নমণিক। মাকৰ সন্মতিত দুয়োৰো বিয়া হয় আৰু নয়নমণিয়ে মৰম আৰু সেৱা-শুশ্ৰূষাৰে শাহুৱেকৰ মন জিনি লয়।

কিন্তু জায়েক জীনুৱে নয়নমণিৰ এই সুখ সহ্য কৰিব নোৱাৰে আৰু তাইক শাহুৱেকৰ পৰা আঁতৰাবলৈ কূটকৌশল ৰচে। লাহে লাহে শাহুৱেকে নয়নমণিক বেয়া পাবলৈ ধৰে আৰু এদিন তাই গিৰিয়েক আৰু দুটি সন্তানক লৈ ঘৰ এৰি ভাড়াঘৰত থাকিবলৈ বাধ্য হয়।

সময় গৈ থাকে আৰু অৰূপৰ মৃত্যু হয়। অকলশৰীয়া নয়নমণিয়ে অশেষ কষ্ট কৰি সন্তান দুটিক ডাঙৰ-দীঘল কৰে। অৱশেষত পৰাগ, জীনু আৰু শাহুৱেক অনুতপ্ত হয় আৰু সকলোৱে নয়নমণিক বিচাৰি ফুৰে।

ছবিৰ কাহিনী, পৰিচালনা আৰু প্ৰযোজনা সকলো সুপ্ৰভা দেৱীৰ। তেওঁৰ স্বামী দ্বিজেন্দ্ৰ নাৰায়ণ দেৱ অসমীয়া ছবিৰ পৰিচালক আৰু বিতৰক আছিল আৰু দেৱীয়ে স্বামীৰ সৈতে বহুকেইখন ছবি প্ৰযোজনা কৰিছিল। স্বামীৰ মৃত্যুৰ পিছত তেওঁ এই ছবিৰ যোগেদি পৰিচালনাৰ জগতত খোজ দিয়ে।

গুণসিন্ধু হাজৰিকাই চিত্ৰনাট্য ৰচনা কৰে আৰু সহযোগী পৰিচালকৰ দায়িত্ব পালন কৰে। ছবিখনৰ কামত কলকাতাত থকা সময়তে এক দুৰ্ঘটনাত তেওঁ চিৰদিনৰ বাবে দৃষ্টিশক্তি হেৰুৱায়। শব্দগ্ৰহণ কালি-মহাদেৱৰ আৰু কলা নিৰ্দেশনা ফটিক বৰুৱাৰ।

সঙ্গীত পৰিচালনা জিতু-তপনৰ। বলীউডৰ প্ৰতিষ্ঠিত কণ্ঠশিল্পী সুমন কল্যাণপুৰ আৰু ভূপিন্দৰে ছবিখনত গীত গাইছে।

মহিলা পৰিচালকে নিৰ্মাণ কৰা প্ৰথমখন অসমীয়া ছবি হিচাপে নয়নমণি স্মৰণীয়।