লটিঘটি

ছবি নিৰ্মাণত আগ্ৰহী এজন মানুহৰ জীৱনত ঘটা নানা হাস্যকৰ ঘটনাক লৈ কাহিনীটো আগবাঢ়ে। ছবি নিৰ্মাণৰ বিষয়ে তেওঁৰ গভীৰ জ্ঞান নাই, তথাপি তেওঁ ছবি বনাবলৈ আগবাঢ়ি আহে।

ভূপেন হাজৰিকাই ছবিখনৰ পৰিচালনা, প্ৰযোজনা আৰু সংগীত পৰিচালনা কৰিছিল। গীত লিখিছিল ভূপেন হাজৰিকা, নিৰ্মলপ্ৰভা বৰদলৈ আৰু গজানন বৰ্মাই। কণ্ঠ দিছিল ভূপেন হাজৰিকা, জয়ন্ত হাজৰিকা, ইলা বসু, মহম্মদ ৰফি, গীতা দাস, অনিল দত্ত আৰু মনীষা সেনগুপ্তাই। জীৱনটো যদি অভিনয় হয় গীতটো জয়ন্ত হাজৰিকা আৰু মণিষা সেনগুপ্তাৰ ওপৰত চিত্ৰায়ণ কৰা হৈছিল। বিজয় শংকৰ আৰু বিদ্যা ৰাওৰ লগতে কুলদা ভট্টাচাৰ্য, ৰত্ন ওজা, হৰিনাৰায়ণ দাস, জ্যোতিষ ভট্টাচাৰ্য, জহৰ ৰয়, নিৰুপতি চেটাৰ্জী আৰু বেবি গুপ্তাই অভিনয় কৰিছিল। ১৯৬৬ চনৰ ২৫ নৱেম্বৰত গুৱাহাটীৰ পল্টনবজাৰৰ মেঘদূত ছবিগৃহত ছবিখন মুক্তি পায়।

চতুৰ্দশ ৰাষ্ট্ৰীয় চলচ্চিত্ৰ মহোৎসৱ (১৯৬৬)ত ছবিখনে শ্ৰেষ্ঠ অসমীয়া চলচ্চিত্ৰৰ ৰাষ্ট্ৰপতিৰ ৰূপৰ পদক লাভ কৰে। ইয়াৰ গীতবোৰ অতি জনপ্ৰিয় হৈছিল আৰু ছবিখনৰ কেপছন আছিল হাঁহি হাঁহি ভাবিব পৰা ছবি।