গৰু

ছবিখন গীতা পাঠকে ক্ৰেয়ন ট্ৰী প্ৰডাকচনৰ বেনাৰত প্ৰযোজনা কৰে আৰু হিমাংশু প্ৰসাদ দাসে পৰিচালনা কৰে। ছাহজাহানৰ চুটিগল্প 'গৰু'ৰ আধাৰত চিত্ৰনাট্য লিখিছে গল্পকাৰ ছাহজাহান নিজে, পৰিচালক হিমাংশু প্ৰসাদ দাস আৰু উদয় ভাস্কৰ পাটৰে। সঙ্গীত পৰিচালক পলাশ সূৰ্য গগৈ। আমাৰ তথ্যভাণ্ডাৰত পাকিজা বেগম, বাহাৰুল ইছলাম, অৰুণ নাথ, চন্দন দাস, লোনীশ্ৰী দাস, কমল লোচন আৰু প্ৰাঞ্জল শইকীয়াৰ নাম অভিনেতা হিচাপে আছে।

ছবিখনত মুঠ পাঁচটা গীত। ইয়াৰ 'ধিক্কাৰ এই জীৱন' গীতটো অঙ্গৰাগ পাপন মহন্ত আৰু হিমাংশু প্ৰসাদ দাসৰ কণ্ঠত বেলেগে বাণীবদ্ধ কৰা হয়। গীতৰ এলবাম ২০২০ চনৰ ১৯ জানুৱাৰীত মুক্তি পাইছিল।

মুক্তিৰ তাৰিখ প্ৰথমে ২০২০ চনৰ ২৪ জানুৱাৰী ঠিক কৰা হৈছিল, পিছত সেই বছৰৰ ১ মে'লৈ আগুৱাই নিয়া হয়। কিন্তু ২০২০ৰ মাৰ্চৰ পৰা কৰোনাৰ বাবে লকডাউন আৰম্ভ হোৱাত মুক্তি দিব নোৱাৰা গ'ল। পিছত চিত্ৰগৃহৰ সলনি ৰাজহুৱা আৰু অস্থায়ী প্ৰেক্ষাগৃহত ছবিখন দেখুৱাবলৈ সিদ্ধান্ত লোৱা হয়। সেই অনুসৰি ২০২১ চনৰ ২২ জানুৱাৰীত গুৱাহাটীৰ কুমাৰ ভাস্কৰ নাট্য মন্দিৰত ইয়াক মুক্তি দিয়া হয় আৰু ২৩ জানুৱাৰীৰ পৰা অসমৰ আন ঠাইৰ এনে প্ৰেক্ষাগৃহত দেখুওৱা হয়।