গানে কি আনে

কাহিনীটো নীলাভ জোনাক বৰুৱা নামৰ এজন সংগীতশিল্পীৰ, যাৰ চৰিত্ৰত অভিনয় কৰিছে জুবিন গাৰ্গে। তেওঁৰ জীৱনৰ প্ৰেম আৰু সংঘাতক কেন্দ্ৰ কৰিয়েই ছবিখন গঢ় লৈছে।

২০১৬ চনৰ ১৪ অক্টোবৰত মুক্তি পোৱা ছবিখন ৰাগা ফিল্ম্‌ছৰ বেনাৰত গৌতম চক্ৰৱৰ্তী, সুনীল গগৈ আৰু ৰাজেশ যশপালে প্ৰযোজনা কৰে। পৰিচালনা আৰু কাহিনী ৰাজেশ যশপালৰ, চিত্ৰনাট্যত সহযোগী ইবছন লাল বৰুৱা। চিত্ৰগ্ৰহণ প্ৰদীপ দৈমাৰীৰ, মুখ্য সহ পৰিচালক অচিন্ত শংকৰ আৰু সহ পৰিচালক মানস চাগ্ৰা। পাবলিচিটী ডিজাইন ড্ৰীম্‌জ ফিচাৰ্ছৰ।

জুবিন গাৰ্গ আৰু পৰিণীতা বৰঠাকুৰৰ লগতে নিপন গোস্বামী, হিৰণ্য ডেকা, ৰিম্পী দাস, ৰীণা বৰা, ৰাজেশ যশপাল আৰু হিমাগ্নি গগৈয়ে অভিনয় কৰিছে। অসম আৰু মুম্বাইকে ধৰি বিভিন্ন ঠাইত ছবিখনৰ শ্বুটিং হয়। জুবিনে নিজেই স্বীকাৰ কৰিছিল যে ছবিখনৰ কাহিনীৰ লগত তেওঁৰ জীৱনৰ যথেষ্ট মিল আছে।

সংগীত পৰিচালনা আৰু আৱহ সংগীত জুবিন গাৰ্গৰ। গীত লিখিছে জুবিন গাৰ্গ, হীৰেণ ভট্টাচাৰ্য আৰু শশাংক সমীৰে। জুবিনৰ অনামিকা এলবামৰ হীৰেণ ভট্টাচাৰ্যৰ 'গানে কি আনে' গীতটি ইয়াত ৰিমেক কৰা হৈছে। দুটা গীতৰ সংগীত ব্যৱস্থাপনা অনুৰাগ শইকীয়াৰ। ২০১৫ চনৰ ১৩ মাৰ্চত গুৱাহাটীৰ শ্ৰদ্ধাঞ্জলি কাননত শ্ৰব্য এলবামটি উন্মোচন কৰা হয়। জুবিনে লিখা 'শালিকী পুৱাৰ' গীতটোক তেওঁৰ জীৱনৰ অন্যতম শ্ৰেষ্ঠ সৃষ্টি বুলি অভিহিত কৰা হয়।