Chor: The Bicycle

ছবিখন প্ৰযোজনা কৰে সঞ্জীৱ নাৰায়ণে নিজৰ এ.এম. টেলিভিছন বেনাৰত ৰামধেনু ফিল্মছ আৰু হোৱাইট ফ্লাৱাৰৰ সহযোগত, সংগীত অনুৰাগ শইকীয়াৰ। ২০১১ চনত ভাৰতীয় আন্তৰ্জাতিক চলচ্চিত্ৰ মহোৎসৱৰ গোৱা ফিল্ম বজাৰলৈ ই নিৰ্বাচিত হয় আৰু ২০১২ চনত ২৩টা প্ৰকল্পৰ ভিতৰত মাত্ৰ চাৰিটাকে ৰটাৰডাম আন্তৰ্জাতিক চলচ্চিত্ৰ মহোৎসৱৰ চিনেমাৰ্টৰ প্ৰডিউচাৰ লেবলৈ আমন্ত্ৰণ জনোৱা হয়, তাত আমন্ত্ৰণ পোৱা প্ৰথম অসমীয়া প্ৰকল্প আছিল ই।

সম্পূৰ্ণ হোৱা ছবিখন মেক্সিকোৰ ৩২সংখ্যক গুৱাদালাজাৰা আন্তৰ্জাতিক চলচ্চিত্ৰ মহোৎসৱৰ ভিডিঅ' লাইব্ৰেৰীলৈ, ২০১৭ চনত আমষ্টাৰডামৰ চিনেকিড স্ক্ৰীনিং ক্লাবলৈ আৰু ২০১৭ চনত বাংলাদেশৰ ১০সংখ্যক আন্তৰ্জাতিক শিশু চলচ্চিত্ৰ মহোৎসৱৰ প্ৰতিযোগিতামূলক পেনোৰামালৈ আমন্ত্ৰিত হয়। ফিলিপাইনছৰ ছালামিণ্ডানাও এছিয়ান ফিল্ম ফেষ্টিভেলত ই বিশেষ প্ৰশস্তি লাভ কৰে, হাৰিয়ানা আন্তৰ্জাতিক চলচ্চিত্ৰ মহোৎসৱত শ্ৰেষ্ঠ শিশুচিত্ৰ, শ্ৰেষ্ঠ চিত্ৰগ্ৰহণ আৰু শ্ৰেষ্ঠ কাহিনী, ২০১৯ চনৰ অহমদনগৰ আন্তৰ্জাতিক চলচ্চিত্ৰ মহোৎসৱত শ্ৰেষ্ঠ ছবি আৰু শ্ৰেষ্ঠ পৰিচালককে ধৰি ছটা বঁটা, আৰু ২০১৯ চনৰ প্ৰাগ চিনে আৱাৰ্ডছত শ্ৰেষ্ঠ নৱাগত পৰিচালক, শ্ৰেষ্ঠ সংগীত আৰু শ্ৰেষ্ঠ গায়কৰ বঁটা লাভ কৰে। ২০১৮ চনৰ ৰাজ্যিক চলচ্চিত্ৰ বঁটাত ই শ্ৰেষ্ঠ নৱাগত পৰিচালক, শ্ৰেষ্ঠ সংগীত আৰু শ্ৰেষ্ঠ শিশু অভিনেতাৰ বঁটা লাভ কৰে।