ৰঞ্জিত দাস

ৰঞ্জিত দাস অসমৰ এগৰাকী চলচ্চিত্ৰ পৰিচালক আৰু সম্পাদক, যিয়ে কাহিনী আৰু অনা-কাহিনী দুয়ো ধৰণৰ ছবি নিৰ্মাণ কৰিছে। দ্বিবন বৰুৱাৰ মন আৰু মৰম ছবিৰ সহকাৰী পৰিচালক হিচাপে তেওঁৰ চলচ্চিত্ৰীয় জীৱনৰ আৰম্ভণি হয়। পিছত তেওঁ জাহ্নু বৰুৱাৰ ইউনিটত যোগ দিয়ে আৰু পাপৰি, হালধীয়া চৰায়ে বাওধান খায়, বনানী, ফিৰিঙতি আৰু হিন্দী টেলিফিল্ম টিংখঙত মুখ্য সহকাৰী পৰিচালকৰ দায়িত্ব পালন কৰে। ফিৰিঙতি আৰু টিংখঙৰ সহযোগী সম্পাদকো তেওঁ আছিল।

স্বাধীনভাৱে তেওঁ পৰিচালনা কৰা প্ৰথম কাহিনী-ছবি প্ৰত্যাৱৰ্তন (১৯৯৩), আৰু দ্বিতীয়খন মামণি ৰয়চম গোস্বামীৰ কাহিনীৰ আধাৰত নিৰ্মিত সংস্কাৰ (১৯৯৭)। দুয়োখন ছবিয়ে সমালোচকৰ দৃষ্টি আকৰ্ষণ কৰিছিল। অসমৰ প্ৰাক্তন মুখ্যমন্ত্ৰী শৰৎ চন্দ্ৰ সিংহৰ বিষয়ে নিৰ্মিত অনা-কাহিনী ছবি অল এল'ন ইফ নিড বি-এ ১৯৯৬ চনৰ ৪৩তম ৰাষ্ট্ৰীয় চলচ্চিত্ৰ বঁটাত পৰিচালকৰ প্ৰথম অনা-কাহিনী ছবিৰ শিতানত ৰজত কমল লাভ কৰে। তেওঁৰ পিছৰ তথ্যচিত্ৰৰ ভিতৰত ২০০৮ চনত মুম্বাই আন্তঃৰাষ্ট্ৰীয় চলচ্চিত্ৰ উৎসৱত প্ৰদৰ্শিত ৰিটাৰ্ণ অৱ দ্য ডেড বাৰ্ড, আৰু বৰপেটাৰ দৌলৎসৱ বিষয়ক হোলী: দ্য স্পিৰিট অৱ কালাৰ্ছ আছে। তেওঁ দুবাৰ ৰাষ্ট্ৰীয় চলচ্চিত্ৰ বঁটাৰ জুৰী হিচাপেও দায়িত্ব পালন কৰিছে।