উপেন কাকতি

উপেন কাকতি গোলাঘাটৰ দেৰগাঁৱৰ এগৰাকী চিকিৎসক আছিল, যিয়ে সুৰকাৰ, নাট্যকাৰ আৰু ঔপন্যাসিক হিচাপেও নাম কৰিছিল। চিকিৎসা মহাবিদ্যালয়ৰ ছাত্ৰ অৱস্থাতে ১৯৬২ চনৰ চীন-ভাৰত যুদ্ধ সম্পৰ্কে তেওঁ ৰচনা কৰা গীতটো পাছত 'বোৱাৰী' ছবিত সন্নিবিষ্ট কৰা হয়, য'ত কণ্ঠ দিছিল সমৰ হাজৰিকাই। 'ৰশ্মিৰেখা' (১৯৭৩)ৰ যোগেদি তেওঁ বোলছবিৰ সংগীত পৰিচালক হিচাপে আত্মপ্ৰকাশ কৰে, আৰু ইয়াৰ এটি গীত ভূপেন হাজৰিকাই গাইছিল। ইয়াৰ পাছত 'বিশেষ এৰাতি', 'প্ৰাণ-গঙ্গা', 'ফাগুনী' আৰু 'বোৱাৰী'ৰ সংগীতো তেওঁৰ, মুঠতে পাঁচখন অসমীয়া ছবি।

১৯৭৯ চনত তেওঁ ড॰ লক্ষ্মীনন্দন বৰাৰ গল্প 'বিশেষ এৰাতি'ক চলচ্চিত্ৰ ৰূপ দিয়ে। ৰাইজৰ দান-বৰঙনিৰে নিৰ্মিত এই ছবিখনৰ পৰিচালনা আৰু সংগীত পৰিচালনা দুয়োটাই তেওঁৱেই কৰিছিল।

তেওঁ পূৰ্ণাংগ আৰু একাংকিকা নাটকো ৰচনা কৰিছিল, তাৰে 'সম্ভ্ৰান্ত অতিথি' ১৯৬৯ চনত প্ৰকাশ পায়। ১৯৮০ চনৰ ১৪ ডিচেম্বৰত মাজুলীৰ জেংৰাইমুখলৈ চলচ্চিত্ৰৰ কামত যাওঁতে হোৱা মটৰ চাইকেল দুৰ্ঘটনাৰ পাছত ৩৮ বছৰ বয়সত তেওঁৰ মৃত্যু হয়। তেওঁৰ সুৰ দিয়া কেবাটাও গান আজিও জনপ্ৰিয়।