নলিন দুৱৰা

নলিন দুৱৰা (জন্ম ২২ জুন ১৯২৮) অসমীয়া চলচ্চিত্ৰৰ এগৰাকী পৰিচালক আৰু চিত্ৰগ্ৰহণকাৰী। তেতিয়াৰ শিৱসাগৰ জিলা, বৰ্তমানৰ গোলাঘাট জিলাত চাহ বাগিছাৰ স্বত্বাধিকাৰী পৰিয়ালত তেওঁৰ জন্ম। গোলাঘাটত স্কুলীয়া শিক্ষা সম্পূৰ্ণ কৰি তেওঁ শ্বিলঙৰ চেইণ্ট এন্থনিজ্ এণ্ড চেইণ্ট এডমণ্ডছ্ কলেজত পঢ়ে।

১৯৪৭ চনত তেওঁ মুম্বাইৰ আব্দুল্লা ফজলভাই ইনষ্টিটিউট অৱ চেইণ্ট জেভিয়াৰ্ছত মোচন পিকচাৰ্চ ফটোগ্ৰাফীৰ দুবছৰীয়া পাঠ্যক্ৰমত ভৰ্তি হয়। তাৰ পিছত কলকাতাৰ ইন্দ্ৰলোক আৰু ইন্দ্ৰপুৰী ষ্টুডিঅ'ত সহকাৰী কেমেৰামেন হিচাপে কাম কৰে আৰু হৃষিকেশ মুখাৰ্জী, বিমল ৰয়ৰ দৰে পৰিচালকৰ সান্নিধ্য লাভ কৰে।

পৰিচালক হিচাপে আমাৰ তথ্যভাণ্ডাৰত থকা তেওঁৰ অসমীয়া ছবি মমতা (১৯৭৩) আৰু ৰতনলাল (১৯৭৫)। এণ্টনী মোৰ নাম (১৯৮৬) ছবিত তেওঁ চিত্ৰগ্ৰহণৰ দায়িত্ব পালন কৰিছিল।