মৈৰঙঠম মণিৰাম সিংহ

মৈৰঙঠম মণিৰাম সিংহ (জন্ম ১৯৭০) অসমীয়া আৰু মণিপুৰী চলচ্চিত্ৰৰ এগৰাকী নিৰ্মাতা, প্ৰযোজক আৰু চিত্ৰনাট্যকাৰ। মণিপুৰী সম্প্ৰদায়ৰ এই শিল্পীজনৰ জন্ম উত্তৰ লখিমপুৰত আৰু তেওঁ বৰ্তমান তাতেই বসবাস কৰে। কিশোৰ বয়সতে অসমলৈ অহা পিতৃৰ তিনিচুকীয়াত এখন ছবিগৃহৰ কাষতে কাপোৰৰ দোকান আছিল, সেয়ে সৰুতেই তেওঁ তাত প্ৰদৰ্শিত প্ৰায় সকলো ছবি চাবলৈ পাইছিল।

স্কুলত একাংকিকাত অভিনয় কৰি পিছত সেই নাটৰ চিত্ৰনাট্য আৰু পৰিচালনাও তেওঁ নিজেই কৰিছিল। ১৯৯০ চনত কলেজত পঢ়ি থাকোঁতে এখন অসমীয়া ভিডিঅ' ছবিৰ সহকাৰী পৰিচালক হিচাপে কাম কৰে। চলচ্চিত্ৰৰ আনুষ্ঠানিক শিক্ষা নোলোৱাকৈয়ে তেওঁ ১৯৯৫ চনৰ পৰা দূৰদৰ্শন আৰু চৰকাৰী বিভাগৰ বাবে ইংৰাজী, অসমীয়া আৰু মেইতেই ভাষাত ২৫ খনতকৈ অধিক ধাৰাবাহিক, তথ্যচিত্ৰ আৰু টেলিফিল্ম নিৰ্মাণ কৰে।

অসমীয়া চলচ্চিত্ৰত তেওঁৰ প্ৰথম ছবি মন যায় (২০০৮) নিজৰ মৈৰঙঠম মুভিজৰ বেনাৰত নিৰ্মিত। ইয়াত জুবিন গাৰ্গ, পবিত্ৰ মাৰ্ঘেৰিটা আদিয়ে অভিনয় কৰিছিল। ছবিখনে ৫৬তম ৰাষ্ট্ৰীয় চলচ্চিত্ৰ বঁটাত শ্ৰেষ্ঠ অসমীয়া ছবিৰ সন্মান লাভ কৰে। ২০১৬ চনত তেওঁৰ সন্ধিক্ষণ ছবিখন মুক্তি পায়।