ভবেন দাস

ভবেন দাস কামৰূপ জিলাৰ ৰামপুৰ গাঁৱৰ এগৰাকী চলচ্চিত্ৰ পৰিচালক। ফণী শৰ্মাৰ ভাস্কৰ পণ্ডিতৰ অভিনয় দেখি তেওঁৰ অভিনয়ৰ প্ৰতি আগ্ৰহ জন্মিছিল আৰু চলচ্চিত্ৰ নিৰ্মাণ শিকিবলৈ তেওঁ কলকাতালৈ গৈছিল। তাত তেওঁ প্ৰথমে ছিৰাজ ছবিৰ দৃশ্যগ্ৰহণত সহযোগী হিচাপে কাম কৰে আৰু পাছত কল্যাণ গুপ্তৰ সহকাৰী হয়; চিত্ৰনাট্য ৰচনাৰ পৰা কাৰিকৰী কাম লৈকে সকলো তেওঁ তেনেকৈয়ে শিকে। বহুকেইখন বঙালী, হিন্দী আৰু ওড়িয়া ছবিত তেওঁ সহকাৰী হিচাপে কাম কৰিছিল।

অসমীয়া চলচ্চিত্ৰত তেওঁ 'পাৰঘাট' (১৯৪৯), 'পিয়লী ফুকন' (১৯৫৫), 'স্মৃতিৰ পৰশ' (১৯৫৬) আৰু 'চাকনৈয়া' (১৯৫৯)ত সহকাৰী পৰিচালক বা কাৰিকৰী পৰামৰ্শদাতা হিচাপে কাম কৰিছিল। তাৰ পিছত তেওঁ স্বাধীনভাৱে প্ৰথম অসমীয়া ছবি 'লখিমী' পৰিচালনা কৰে। আমাৰ তথ্যভাণ্ডাৰত 'উপগ্ৰহ' (১৯৭২), 'ধৰ্মকাই' (১৯৭৬) আৰু 'মা' (১৯৮৬)ৰ পৰিচালক হিচাপেও তেওঁৰ নাম আছে। অসমীয়া ছবিৰ উপৰিও তেওঁ বঙালী ভাষাৰ 'কানামাছি' ছবিখন পৰিচালনা কৰিছিল।