সুপ্ৰভা দেৱী

সুপ্ৰভা দেৱী (২৪ ডিচেম্বৰ ১৯৩৮ - ১৪ জুন ২০১১) অসমৰ প্ৰথম মহিলা চলচ্চিত্ৰ পৰিচালিকা আৰু এগৰাকী প্ৰযোজিকা। তৈলনগৰী ডিগবৈত জন্ম হোৱা তেওঁ দ্বিজেন্দ্ৰ নাৰায়ণ দেৱৰ সৈতে বিবাহৰ পাছত চলচ্চিত্ৰ জগতৰ সৈতে জড়িত হয় আৰু স্বামীৰ সৈতে যোগ-বিয়োগ (১৯৭০), তৰামাই (১৯৭২), মৰমী (১৯৭৬) আৰু ৰাংঢালী (১৯৭৯)ৰ দৰে ছবিত কাম কৰে।

১৯৮৪ চনত নয়নমণি ছবিৰে তেওঁ অসমৰ প্ৰথম মহিলা পৰিচালিকা হয়, আৰু ইয়াৰ বাবে ১৯৮৫ চনত শিল্পী দিৱস বঁটা লাভ কৰে। ১৯৮৬ চনত লক্ষ্মীনাথ বেজবৰুৱাৰ কাহিনীৰ আধাৰত তেওঁ সৰবজান পৰিচালনা কৰে, য'ত তেজপুৰৰ হীৰেন চৌধুৰী সহ-পৰিচালক আছিল। তেওঁ গীতিকাৰ হিচাপেও পৰিচিত আছিল আৰু গুৱাহাটী দূৰদৰ্শন কেন্দ্ৰৰ বাবে তথ্যচিত্ৰ আৰু ধাৰাবাহিক নিৰ্মাণ কৰিছিল, তাৰ ভিতৰত ২০০৩ চনৰ জিলিকাব লুইতৰে পাৰ অন্যতম।

পাঁচ বছৰ বৃক্কৰোগত ভুগি ২০১১ চনত গুৱাহাটীত ৭৩ বছৰ বয়সত তেওঁৰ মৃত্যু হয়।