গুণসিন্ধু হাজৰিকা

গুণসিন্ধু হাজৰিকা এগৰাকী অসমীয়া ছবিৰ পৰিচালক তথা সহকাৰী পৰিচালক আছিল। ১৯৩০ ৰ দশকৰ মধ্যভাগত নগাঁও জিলাৰ কামপুৰৰ তেতেলিসৰা গাঁৱত তেওঁৰ জন্ম হৈছিল। ১৯৬০ ৰ দশকত মুম্বাইত ৰাজ কাপুৰৰ এখন ছবিৰ স্পটবয় হিচাপে তেওঁ চলচ্চিত্ৰ জগতত খোজ পেলায়, আৰু পিছত মণিৰাম দেৱান (১৯৬৪), আদালত, সন্ধ্যাৰাগ (১৯৭৭), অনিৰ্বাণ (১৯৮১) আৰু নয়নমণি আদি বহু ছবিৰ পৰিচালনা সহকাৰী হয়।

নয়নমণিৰ কাম কৰি থাকোঁতে এক দুৰ্ঘটনাত তেওঁ দৃষ্টিশক্তি হেৰুৱায়। স্বাধীনভাৱে পৰিচালনা কৰা তেওঁৰ একমাত্ৰ অসমীয়া ছবি শিশুছবি অবুজ বেদনা (১৯৯৩); ছবিখন হিন্দীত ডাব কৰি দূৰদৰ্শনৰ ৰাষ্ট্ৰীয় কাৰ্যক্ৰমত দেখুওৱা হৈছিল। তেওঁ ভোজপুৰী ছবি গোৰীও পৰিচালনা কৰিছিল আৰু দুখন হিন্দী ছবিৰ সৈতেও জড়িত আছিল।

শেষ বয়সত তেওঁ পিচিঅ' চলাইছিল আৰু অসম চৰকাৰৰ শিল্পী পেঞ্চনৰ ওপৰত নিৰ্ভৰ কৰিবলগীয়া হৈছিল। ২০১৮ চনত কামপুৰৰ আৰোহনে তেওঁক কপিলী বঁটাৰে সন্মান জনায়। ২০২৩ চনৰ ২৮ জানুৱাৰীত গুৱাহাটীত তেওঁৰ মৃত্যু হয়।