বিজয় চৌধুৰী

বিজয় চৌধুৰী (সি. বিজয় নামেও পৰিচিত) হিন্দী ছবিৰ এজন সম্পাদক আছিল। গুৱাহাটীৰ সন্তান তেওঁ ১৯৬৭ চনত পুনা ফিল্ম ইনষ্টিটিউটত চলচ্চিত্ৰ সম্পাদনাৰ পাঠ্যক্ৰম সম্পূৰ্ণ কৰি বম্বেলৈ যায় আৰু শক্তি সামন্তৰ সম্পাদকসকলৰ সহকাৰী হিচাপে কাম আৰম্ভ কৰে। সামন্তই পাছত 'অনুৰাগ' ছবিত তেওঁক মূল সম্পাদকৰ দায়িত্ব দিয়ে। ১৯৭৭ চনত 'বালিকা বধূ'ৰ সম্পাদনাৰ বাবে তেওঁ শ্ৰেষ্ঠ সম্পাদকৰ ফিল্মফেয়াৰ বঁটা লাভ কৰে।

অসমীয়া চলচ্চিত্ৰত তেওঁ নিৰোদ চৌধুৰীৰ কাহিনীৰ আধাৰত পীযুষ কান্তি ৰয়ৰ সৈতে যুটীয়াভাৱে 'কাঁচঘৰ' (১৯৭৫) পৰিচালনা কৰে আৰু ছবিখনৰ সম্পাদনাও কৰে। তেওঁ 'যুঁজ' (১৯৯০), 'প্ৰেম জনমে জনমে' (১৯৯১), 'অবুজ বেদনা' (১৯৯৩), 'একত্ৰিশ জুন' (১৯৯৪), 'হৃদয়ৰ আঁৰে আঁৰে' (১৯৯৪), 'পানী' (১৯৯৫) আৰু 'যৌৱনে আমনি কৰে' (১৯৯৮)কে ধৰি আন বহুকেইখন অসমীয়া ছবিৰো সম্পাদনা কৰিছিল।